Gazetarja e Klan Kosovës Qëndresa Bellagoshi dhe shoferi Elsad Sinani, u deshtë të marrin tretman mjekësor në spitalin rajonal të Mitrovicës për shkak të lëndimeve të marra.
Kjo pasi ekipi i televizionit u sulmua me gurë nga persona të maskuar në fshatin Zupç të Zubin Potokut, ku kishin shkuar të raportonin për situatën në atë pjesë në ditën e 17-të të vendosjes së barrikadave.
Bashkë me ta ishin edhe kameramani Agon Bejtullahu dhe gazetari tjetër Drin Demiri.
E se si ka ndodhur sulmi tregon gazetari Drin Demiri.
“Jemi afruar rreth 30 metra nga barrikada e parë. I kemi parë tre persona të cilët ishin duke ecur skaj rrugës dhe në momentin kur e kanë parë ekipin e televizionit ata janë ndalur në vend. Ne kemi vazhduar edhe pak duke marrë pamje nga barrikadat që nuk ka zgjatur më shumë sesa tre minuta dhe i kemi parë ata persona që kanë ndaluar edhe kanë vendosur shallë në fytyrat e tyre dhe kanë marrë gurë nga toka dhe posa ekipi i Klanit është kthyer rrugës për në Mitrovicë, ata kanë gjuajtur veturën me gurë”, tha Demiri.
