Vendet baltike po i bëjnë presion Gjermanisë që të dërgojë tanket, Moska mund të nisë një ofensivë të re në muajt e ardhshëm
Rusia sërish ka bombarduar pjesën lindore të Ukrainës në vijën kryesore të frontit në zonën industriale Donbas. AFP raporton se ushtria ruse ka nisur një ofensivë në rajonin Zaporizhzhia në juglindje të Ukrainës. Rajoni ka qenë skenë e luftimeve intensive javët e fundit. Guvernatori i saj, Oleksandr Starukh, tha se forcat ruse ka kryer më shumë se 160 sulme bombardime.
Në një postim në Telegram ai tha se 21 qytete ishin shënjestruar ndërsa një grua u vra dhe dy persona të tjerë u plagosën. Bombardimet vijnë ndërsa Presidenti Volodymyr Zelenskiy dhe zyrtarë të tjerë ukrainas kanë thënë se Moska ka të ngjarë të kryejë një ofensivë gjithpërfshirëse në muajt e ardhshëm. Pranë Kreminës në veri-lindje, forcat e Ukrainës kanë bërë fitime të vogla dhe janë mbrojtur kundër kundërsulmeve ruse.
Kancelari gjerman Olaf Scholz ka bërë të ditur se Gjermania do të vazhdojë të mbështesë Ukrainën, duke folur disa ditë pasi aleatët perëndimorë ulën shpresat për një dërgesë të shpejtë të tankeve. Ministri i ri i mbrojtjes i Gjermanisë, Boris Pistorius, ka planifikuar një vizitë në Ukrainë së shpejti , pasi Berlini përballet me presion për të lejuar dërgimin e tankeve Leopard të prodhimit gjerman.
Aleatët perëndimorë premtuan miliarda dollarë armë për Ukrainën javën e kaluar, megjithëse nuk arritën të bindin Gjermaninë të heqë veton për sigurimin e tankeve. Vendet baltike i kanë thënë Gjermanisë që të dërgojë tanket sa më shpejt që të jetë e mundur pasi janë të nevojshëm për të ndaluar agresionin rus.
Një aleat i ngushtë i presidentit Vladimir Putin ka deklaruar se dërgesat e armëve sulmuese në Kiev që kërcënojnë territoret e Rusisë do të çojnë në një katastrofë globale.
Ndërkaq Shtetet e Bashkuara do të vendosin sanksione shtesë javën e ardhshme kundër kompanisë ushtarake private ruse Wagner Group , për të cilën zyrtarët amerikanë thonë se ka ndihmuar ushtrinë ruse në luftën në Ukrainë. Kreu i Wagner, Yevgeny Prigozhin, publikoi një letër të shkurtër drejtuar Shtëpisë së Bardhë duke pyetur se për çfarë krimi akuzohej kompania e tij, pasi Uashingtoni njoftoi sanksionet e reja.
Klan News
